O sistema permite a impresión de imaxes nunha impresora convencional a partir dunha mensaxe DICOM, cun formato específico definido por un modelo PDF, por medio dun servidor de impresión que responde a dúas mensaxes DICOM, DicomPrint e DicomStore. Esta última mensaxe, que non se utiliza normalmente para imprimir, usarase co obxectivo de permitir dous tipos de configuración para ampliar a información de impresión e incluír datos do/a paciente.

É posible ademais, por tanto, imprimir datos relativos ao/á paciente, procedentes tanto do ficheiro DICOM (en DicomStore) como dun informe do/a radiólogo/a. Neste último caso, a impresión quedará suspendida até o devandito informe estar dispoñible.

No servidor de impresión existen varias configuracións de impresión que quen o administre pode asociar á mensaxe DicomPrint ou DicomStore. Así mesmo, cada configuración de impresión ou perfil permite configurar unha impresora previamente instalada no sistema, o PDF de modelo, o número de copias, o número de imaxes por folla, gamma, contraste, filtro de suavizado e filtro de realce.

A impresión realizarase sobre un modelo predeterminado proporcionado previamente, sobre o cal se imprimirán as imaxes e algúns dos campos asociados ao/á paciente que conteña o ficheiro DICOM, así como o informe do/a radiólogo/a.