Moitas das reaccións industriais que se realizan arestora precisan de temperaturas elevadas e usan catalizadores químicos que poden ser agresivos para o medio. Substituílos por catalizadores biolóxicos que sexan estables a altas temperaturas favorece que a industria sexa máis respectuosa coa súa contorna ambiental. Alén disto, os biocatalizadores termoestables adoitan presentar unha maior resistencia á desnaturalización en presenza de solventes orgánicos, axentes caotrópicos e deterxentes, e, polo xeral, non requiren refrixeración para se manter en forma activa.
Os enzimas que se ofertan foron modificados para incrementar a súa termoestabilidade ou illados a partir de metaxenotecas de fontes xeotermais, polo que potencialmente resultan de interese para unha gran variedade de industrias. Temos, ademais, a capacidade técnica e o coñecemento necesario para illar, baixo demanda, outros enzimas diferentes aos dispoñibles a partir das metaxenotecas obtidas de augas termais; ou ben realizar, caso de ser necesario, unha evolución dirixida á carta dos enzimas para mellorar a súa eficiencia catalítica.