O proxecto de investigación en que se enmarca este sistema refírese á rápida construción de edificacións en caso de catástrofe humanitaria, en que é imprescindible que as construcións que se erixan respondan a características como a facilidade de transporte, a sinxeleza de levantamento, a recuperación do sistema ou a versatilidade das solucións formais. En calquera caso, a nosa resulta unha solución adecuada para calquera necesidade dunha construción de carácter non permanente, polo que o seu campo de interese excede ó da construción de emerxencia inicialmente formulada.

Entendemos que o sector económico en que podería aplicarse o seu uso sería o da construción prefabricada, con destino a calquera tipo de estrutura-construción temporal. Así mesmo, en relación coas situacións de emerxencia ou catástrofe humanitaria, sería moi axeitado que os organismos públicos dispuxesen dun stock deste tipo de solucións para unha rápida e inmediata implantación no lugar requirido das estruturas que permitan atender os damnificados. Polas mesmas consideracións, tamén sería de interese para as organizacións de rápido auxilio como bombeiros, unidades militares de emerxencia etc., ou ONG.