Este grupo estudou os diferentes medios de xeración de enerxía eléctrica e comparounos tendo en conta os aspectos ambientais, sociais, económicos e técnicos da sustentabilidade. Logo diso estableceu clasificacións aplicables á práctica totalidade de países e áreas xeográficas do planeta. Os métodos que empregou, unha parte dos cales son de desenvolvemento propio, tamén poden aplicarse a outros tipos de xeración de enerxía e, en xeral, a sistemas de calquera tipo que empreguen enerxía para o seu funcionamento.

A aplicación destes métodos serve tanto para a planificación enerxética nacional, autonómica e rexional como para a propia das empresas que producen ou consomen enerxía, con vistas a escoller a carteira de proxectos máis sustentables para cada caso. É útil tamén para comparar sistemas enerxéticos, co obxecto de escoller o máis sustentable, tanto cando existen varias opcións como cando se está a deseñar un novo sistema. Por último, o grupo desenvolveu unha metodoloxía para optimizar a sustentabilidade e aplicable a diversos sistemas enerxéticos.