Invención dun sistema calefactor e refrixerador que aproveita o comportamento de certos materiais fronte a cambios de presión (efecto barocalórico), mediante un ciclo pechado, de funcionamento continuo. A través dun fluído caloportador verifícanse procesos de transferencia de calor en intercambiadores/rexeneradores activos que contan con material barocalórico, e en intercambiadores que actúan como foco frío e quente do ciclo. Tamén se proporcionan procedementos de control do devandito sistema calefactor e refrixerador, xunto cos controladores e programas informáticos correspondentes.

En maior detalle, o sistema está constituído por un circuíto fluídico, unha unidade de presión e unidades operativas que inclúen dous intercambiadores activos barocalóricos, un foco calefactor e un foco refrixerador. O circuíto fluídico fai que un fluído caloportador circule entre e polas unidades operativas. Cada intercambiador alberga material barocalórico para que o fluído caloportador absorba calor do material barocalórico baixo presurización ou ceda calor ao material barocalórico baixo despresurización. A unidade de presión produce a presurización e a despresurización mencionadas.

O foco calefactor fai que o fluído caloportador, que absorbeu calor nun dos intercambiadores en fase de presurización, circule quentando o seu contorno. O foco refrixerador fai que o fluído caloportador, que cedeu calor nun dos intercambiadores en fase de despresurización, circule arrefriando o seu contorno. O sistema de control permite o efecto continuo de quentamento e arrefriamento mediante a presurización e despresurización dos intercambiadores, así como o adecuado direccionamento do fluído caloportador a través de válvulas de control.

(1) Foco frío. (2) Bomba de circulación. (3), (5), (9), (7) Válvulas de control. (4), (8) Intercambiadores/rexeneradores activos barocalóricos (ABR). (6) Foco quente. (10) Sistema de presurización/despresurización.