Os sistemas de unións con barras encoladas constitúen un sistema eficiente para a transmisión de esforzos elevados en estruturas de madeira. No obstante, a súa capacidade está condicionada por diversos factores: lonxitude da ancoraxe, diámetro do furo etc., que, pola súa vez, dependen das dimensións das pezas de madeira.

Unha das alternativas formuladas para mellorar a capacidade das unións efectuadas con esta tecnoloxía foi o uso de bulbos adhesivos. Estes bulbos confórmanse a partir do ancheamento puntual de pretradeados rectos. Posteriormente, o conxunto énchese cun adhesivo estrutural e insírense as barras, de menor diámetro que o furo recto. A existencia dos bulbos incrementa o bloque de cortante con que traballa a madeira, e, xa que logo, aumenta a resistencia final das unións. Poden facerse tamén diversos ancheamentos ao longo dun mesmo furo, o que limita as solicitacións en cada un dos bulbos e mellora aínda máis a capacidade das unións.

As ferramentas existentes no mercado para realizar, por exemplo, ancheamentos en ancoraxes de formigón non son aplicables á madeira pola súa limitada capacidade fronte a esforzos de fendedura.

Outra información de interese:

A tecnoloxía descrita para a ancoraxe de barras encoladas usando un ou varios bulbos adhesivos foi estudada experimentalmente e recoñecida con dúas patentes de investigación («Sistema de fixación de barras en madeira mediante bulbo adhesivo» e «Sistema de ancoraxe de barras encoladas en elementos de madeira mediante furos con ancheamentos múltiples»). Pode obterse máis información na páxina web: http://investigacion.udc.es/gl/Research/Details/G000399